" غرفة الإفطـار "

صباحكم عسل و بانكيك =)

و كوب كافي دافي لأن الجو هنا بارد شوي على شارع الحياة..

لما قريتوا العنوان (غرفة الإفطار)جا في بالكم غرفه فيها شباك كبير و طاوله في النص يجلسون عليها الناس يروقون الصباح.

أما في مؤسستنا غرفة الإفطار غير!


غرفة صغيره جدا، ما فيها شبابيك توزعت فيها كنبات سودا كبيره و طاوله صغيره في النص


انحشرت في زاويتها ثلاجه و مايكرويف، و غلايه سودا فيشها مفصول لأن ما فيه توصيله يتوصل فيها

من أول ما تدخلين ، تميزين ريحة الهقوه العربيه
و شوية خصوصية بعدي عن البنات !

لكن تدرون؟
بالرغم من كل هذا تظل هالغرفه متنفس !
بعيد عن مكاتبنا
و بعيد عن شغل المؤسسه اللي ما ينتهي
اتخيل كم السوالف اللي انقالت في هالغرف!
و كم المناقشات عن شتى المواضيع
العنود تتكلم عن الكوافيره اللي راحت تقص شعرها عندها.. انها مرره شاطره
فاطمة عجبها الخبز الأحمر الحساوي بما انها من جده و تسأل هبه و أسما كيف يتسوى
إيمان تحش في طالباتها و تحرشني على متدربات مستوى رابع
دعاء تذكرنا باجتماع القسم يوم الثلاثاء و تنبه علي اني ما اتاخر كالعاده
أنا و جوهره تنتاقش في موضوع دورة التصوير الفوتوغرافي اللي بأسويها للبنات
و غيره كثير

و بصراحه..
لما أبي مكان أختلي فيه ..
ما القى الا هالغرفه

أجلس فيها و أسمع صوت نفسي و ياخذني التفكير
تخدرني ريحة القهوه العربيه..

و ارجع بعد نص ساعه للمكتب
تسألني فاطمة وين كنتي؟

أقول لها
عندي شغل!
و بيني و بين نفسي أقول

كنت أخذ لي غفوه.. في غرفة الإفطار...}